​Stortingsvalet 2025 fann stad i ei tid prega av aukande polarisering, internasjonal uro og store spørsmål om økonomi, tryggleik og samfunnsutvikling. Samstundes såg vi nye konfliktlinjer, endra veljarrørsler og ei mobilisering som sette sitt preg på valkampen. Kva var det som dreiv veljarane? Kvifor stemte nordmenn slik dei gjorde? Og kva fortel valresultatet om retninga for norsk politikk dei komande åra?

Denne kvelden inviterer vi til ein samtale med Johannes Bergh, ein av Noregs fremste valforskarar, med utgangspunkt i boka Konflikt og mobilisering. Ein studie av stortingsvalet 2025. Boka gir eit djupdykk i dei viktigaste konfliktlinjene, sakene og veljardynamikkane som forma valet, og analyserer korleis politiske parti, samfunnsendringar og internasjonale utviklingstrekk påverkar norsk demokrati.

Gjennom eit føredrag og ein påfølgjande panelsamtale vil vi sjå nærare på kva stortingsvalet 2025 kan fortelje oss om tilstanden til det norske demokratiet. Korleis endrar veljarane seg? Kva rolle spelar sosiale medium, identitet og geopolitiske hendingar? Er norsk politikk på veg inn i ei ny tid? I tillegg til Johannes Bergh deltek Dag Arne Christensen, forskar ved NORCE, i panelet. Fleire paneldeltakarar vil bli annonserte etter kvart.

Johannes Bergh er forskingsleiar ved Institutt for samfunnsforsking og ein av dei leiande valforskarane i Noreg. Han har gjennom mange år forska på val, politisk deltaking og veljaråtferd, og har vore sentral i arbeidet med den norske valforskinga.

Samtalen blir leia av Ole Rasmus Øvretveit, medan Lise Øvreås, professor ved Universitetet i Bergen, ønskjer velkomen.

150,–/120,–

Gratis for studentar ved framvising av studentbevis og for medlemmar av Academia Europaea

Foto: Norce, Trond Isaksen, Canva.

‍